تورک وطنداشی، وکیل و شرقی آذربایجان وکیللر کانونونون عضوو زهرا نقشینه تبریز عمومی و اینقلاب دادسراسینین سورغو شعبه‌سینین ۱۵-نجی بؤلمه‌سینه گلدیکدن سونرا تهلوکه‌سیزلیک قوه‌لری طرفیندن توتولوب و ناملوم یئره آپاریلیب.
بیلگیلی قایناقلارین وئردیگی خبره گؤره، وکیل ۲۰۲۶-جی ایلین سنتیابرین ۹-دا، چارشنبه گونو (۱۴۰۵-جی ایل شهریورون ۱۸-ده) رسمی چاغیریش آلاندان سونرا ایضاح وئرمک اوچون ۱۵-نجی بؤلمه‌یه گلمیشدی. محکمه قورومونا گلدیکدن سونرا تهلوکه‌سیزلیک قوه‌لری اونو توتوب.
زهرا نقشینه‌نین چاغیریش وَرَقه‌سینده ایتهام «جزایی وصفین یوخلوغو» کیمی قید اولونموشدو. بونا باخمایاراق، تبریز اطلاعات اداره‌سینین حسابتینا گؤره، اونون قادین حاقلاری و حقوقی مسئله‌لر ساحه‌سینده‌کی پئشه و صنفی فعالیتی ایله باغلی باره‌سینده ایش آچیلیب.
زهرا نقشینه شرقی آذربایجان وکیللر کانونونون بانوان کمیسیاسیندا و قادینلارا قارشی زورلوغون قارشیسینین آلینماسی دبیرلیگینده فعالیت گؤستریب، کئچن ایللر بویو قادین حاقلارینین مدافعه‌سی، حقوقی و مدنی فعالیت ساحه‌لرینده ایشتیراک ائدیب.
بو وکیلین ساخلانیلما یئری، مشخص ایتهاملار و ایشین حقوقی وضعیتی باره‌ده آیدین بیلگی وئریلمه‌دن توتولماسینین داوام ائتمه‌سی اونون قانونی حاقلارینا ریعایت اولونماسی، وکیله و عاییله‌سینه چیخیشی ایله باغلی نیگارانچیلیغی آرتیریب.
