تورک آذربایجانلی مدنی فعال، آذرشهرلی (توفارقان) گؤزل نجفی توتولماسیندان ۲۲ گون کئچمه‌سینه باخمایاراق بلیرسیزلیک ایچینده قالیر. عاییله‌سی ایندییه‌دک اونون هارادا ساخلانیلدیغی، اونا قارشی ایره‌لی سورولن ایتهاملار و صاغلاملیغی باره‌ده آیدین بیلگی آلمایب.
ایراندا آذربایجان خالقینین اینسان حاقلاری قورومونا (آهراز) چاتان بیلگیه گؤره، ۵۰ یاشلی گؤزل نجفی مدنی حاقلار، آنا دیلینده تحصیل و ائکولوژی طلبلر ساحه‌سینده فعالیت گؤستریر. او، ۲۰۲۶-جی ایلین آقوستونون ۲۳-ده، بازار گونو (۱۴۰۵-جی ایل شهریورون ۱-ده) آذرشهرده حکومت قوه‌لری طرفیندن توتولوب و تقریباً بیر هفته بو شهرده ساخلانیلاندان سونرا تبریزه آپاریلیب. آپاریلدیغی گوندن اونون وضعیتی و ساخلانیلدیغی یئر باره‌ده دقیق بیلگی یوخدور.
سببلر، ساخلانیلما یئری و ایشین حقوقی وضعیتی آچیق اعلان ائدیلمه‌دن توتولمانین داوام ائتمه‌سی، عاییله و وکیله ارتباطین محدودلاشدیریلماسی ایله بیرلیکده، توتولان شخصین حاقلارینا و عادلانه محاکمه پرنسیپلرینه ریعایت اولونماسی ایله باغلی جدی نیگارانچیلیق یارادیر. مسئول قوروملار گؤزل نجفینین وضعیتی و تالئیی باره‌ده بیلگی وئرمه‌لی، اونون وکیله چیخیشی و عاییله‌سی ایله ارتباط ایمکانی دا داخل اولماقلا، قانونی حاقلارینی تأمین ائتمه‌لیدیرلر.
