سکگیز آذربایجانلی زندانلی — آراز آمان زینال‌آباد، ایاز سیف‌خواه، ودود اسدی، تانینمیش آذربایجانلی اینسان حاقلاری وکیلی محمدرضا فقیهی، آذربایجانلی وکیل طاهر نقوی، محمود اوجاقلو، کرم مردانه و مرتضی پروین — ایران رئیس‌جمهورو مسعود پزشکیانا آچیق مکتوب یازاراق اونون بیرباشا مداخله‌سینی و اؤزلرینین نهادینه‌لشمیش ظلم آدلاندیردیقلاری وضعیتین داوام ائتمه‌مه‌سینی طلب ائدیبلر.
مکتوبون مؤلفلری بیلدیریرلر کی، اونلار ۲۰۲۴-جو ایلین فورال آیی‌ندا تهلوکه‌سیزلیک ممورلاری طرفیندن هماهنگ شکیلده و قانونی چاغیریش اولمادان توتولوبلار. متهملرین چوخو توتولمادان اول بیر-بیرینی تانیمیردی و آرالاریندا تشکیلاتی و یا قروپ باغلانتیسی یوخ ایدی.
بونا باخمایاراق، تهلوکه‌سیزلیک ممورلاری، خوصوصیله اطلاعات وزارتی کیفایت قدر سندلی سوبوت و محکمه حکمی تقدیم ائتمه‌دن اونلاری «اؤلکه‌نین تهلوکه‌سیزلیگینه قارشی جینایت تؤرتمک مقصدی ایله سازیش»، «جاسوسلوق» و «دؤولته قارشی تبلیغات» کیمی ایتهاملارلا توتوب، ائولرینده آختاریش آپاریب و شخصی اشیالارینی ضبط ائدیبلر.
سورغولار چوخ واخت وکیلین ایشتیراکی اولمادان آپاریلیب، اونلارا حتی تأیید اولونموش سیاهیدان وکیل سئچمک ایمکانی دا وئریلمه‌یب. مکتوبا گؤره، بعضی حاللاردا سورغو بئش دقیقه‌دن آز چکیب و آغیر تهلوکه‌سیزلیک ایتهاملاری اونلارا یالنیز «ایشین اوخونماسی» سویه‌سینده بیلدیریلیب.
مکتوبون باشقا بیر بؤلومونده زندانلیلار زورلا اعتراف آلماق اوچون سورغو آپارانلارین گؤستردیگی شدتلی فشاری قید ائدیرلر. اونلارین سؤزلرینه گؤره، اوین زندانینین ۲۰۹-جو بؤلومونده تکنفرلیک سلولدا ۲۰-دن ۴۰ گونه قدر فیزیکی و پسیخولوژی فشارا، تهدیدلره و تحقیرلره معروض قالیبلار. مکتوبدان بیر حیصه: «حتی کامئرانین قارشیسیندا کئچمیشیمیزه گؤره پشیمانلیق بیلدیرمگیمیز و بوندان سونرا سؤزده تجزیه‌طلبلرله همکارلیق ائتمه‌یه‌جگیمیزه سؤز وئرمگیمیز تکلیف اولونوب.»
۵۵-دن چوخ جیلدلیک ایش بیر هفته‌دن آز مدتده کیفرخواستین وئریلمه‌سینه سبب اولوب و متهملر قاضی صلواتینین رئیسلیک ائتدیگی تهران اینقلاب محکمه‌سینین ۱۵-نجی شعبه‌سی طرفیندن جمعاً ۱۰۰ ایلدن آرتیق حبسه محکوم ائدیلیب. مؤلفلر دئییرلر کی، قاضی حکمو مستقل وکیللرین مدافعه‌سینی نظره آلمادان و یالنیز اطلاعات وزارتینین سورغو آپارانلارینین بیرطرفلی گزارشلری اساسیندا چیخاریب. اونلار همچنین ایددیا ائدیرلر کی، دادستان کیفرخواست وئریلنه قدر ایشی اوخوماییب و اونو یالنیز اطلاعات وزارتینین شفاهی ایضاحلارینا اساساً ایمضالاییب.
اسرائیلین تهرانا موشک حمله‌سی زامانی اوین زندانی دا هدف آلینیب. مؤلفلرین سؤزلرینه گؤره، موهاریبه شرایطینه گؤره زندانلیلارین آزاد ائدیلمه‌سی و یا مرخصی‌یه بوراخیلماسی باره‌ده مراجعتلره باخمایاراق، قضاییه قوه‌سی درهال هئچ بیر آددیم آتمایب.
بو حادثه‌دن سونرا مکتوبون مؤلفلری گئجه «ایگرنج و تحقیرلی» شکیلده، زنجیر و قول‌بند آلتیندا، آج و سوسوز حالدا بؤیوک تهران زندانینا کؤچورولوبلر. اونلارین دئدیگینه گؤره، مینیمال بیولوژیک و حیژیئنیک استانداردلاردان محروم اولان بو زندانداً ایندی اسفناک شرایطده یاشاییرلار.
مکتوبون سونوندا ایمضالایانلار رئیس‌جمهورو خالقین حاقلارینی قورومایا مجبور ائدن قانون اساسینین ۱۲۱-نجی ماده‌سینه استناد ائدره‌ک بونلاری طلب ائدیرلر:
1. ایشلرین مستقل هیئت طرفیندن هرطرفلی و عادلانه یئنیدن باخیلماسی.
2. تهلوکه‌سیزلیک ممورلارینین قانونسوز رفتارینین درهال دایاندیریلماسی.
3. متهملرین محروم ائدیلدیگی حاقلارا گؤره تاوان.
4. ایشلرین اویدورولماسیندا رول اوینایان ممورلارین و قاضیلرین مشخصلشدیریلمه‌سی.
5. ایندیکی غیراینسانی شرایطده ساخلانیلان زندانلیلارین درهال آزاد ائدیلمه‌سی.
